ليلة حافلة بالأحداث فالمحمدية.. جريمة وواقعة سقوط سيدة من الطابق وسط استنفار أمني

ليلة حافلة بالأحداث فالمحمدية.. جريمة وواقعة سقوط سيدة من الطابق وسط استنفار أمني
شهدات مدينة المحمدية، ليلة الأربعاء، جوج ديال الوقائع اللي استنفرو المصالح الأمنية، وخلاو حالة من القلق وسط الساكنة، فانتظار شنو غادي تكشف عليه الأبحاث والتحريات الجارية.
الواقعة الأولى كتتعلق بوفاة شابة فظروف غامضة، بحيث حسب المعطيات الأولية المتوفرة، كاينة شبهات مرتبطة بمخدرات من نوع «البوفا». وفور علمها بالواقعة، انتقلت المصالح الأمنية إلى عين المكان، بحضور عناصر الشرطة العلمية والتقنية، اللي قامت بالمعاينات اللازمة ورفعت مجموعة من الآثار والعينات اللي ممكن تساعد فالكشف على ظروف وملابسات الوفاة.
وحسب نفس المعطيات، تم نقل جثمان الهالكة لاستكمال الإجراءات القانونية والطبية، فيما فتحت المصالح المختصة بحثاً تحت إشراف النيابة العامة المختصة، بهدف معرفة الحقيقة كاملة وتحديد المسؤوليات.
أما الواقعة الثانية، فكتتعلق بسيدة تعرضات للسقوط من علو، وذلك مباشرة بعد نزاع وقع، حسب المعطيات الأولية، بينها وبين الزوج ديالها.
السيدة سقطات من واحد الطابق فالبناية، ومازال ما تأكدش بشكل رسمي واش الطابق الثاني أو طابق آخر، وأصيبت بجروح خطيرة، حيث تم نقلها على وجه السرعة للمستشفى، وحسب المعطيات المتوفرة فحالَتها الصحية حرجة.
وفي المقابل، تم اقتياد الزوج إلى مصالح الدرك الملكي، من أجل الاستماع إليه والتحقيق معاه فظروف وملابسات الواقعة.
ويبقى تحديد المسؤوليات والظروف الحقيقية اللي وقعات فيها هاد الأحداث رهين بنتائج الأبحاث والتحريات، وكذا الخبرات الطبية والعلمية، خصوصاً أن الوقائع مازالت فالساعات الأولى.
محمدية بريس غادي تبقى متابعا هاد الأحداث، وغادي تنقل ليكم أي معطيات جديدة وموثوقة فور توفرها من المصادر الرسمية

الفيديو تجدونه بصفحتنا للبث المباشر mp live